انڈونیشیا میں ٹرین حادثے میں اموات بڑھ کر 14 تک پہنچ گئیں، امدادی کارروائیاں مکمل
جکارتا: انڈونیشیا کے دارالحکومت جکارتا کے قریب ٹرین حادثے میں ہلاکتوں کی تعداد 14 تک پہنچ گئی ہے جبکہ 84 افراد زخمی ہوئے ہیں۔ ریسکیو حکام کے مطابق ملبے میں پھنسے تمام مسافروں کو نکالنے کا عمل مکمل کر لیا گیا ہے۔
یہ حادثہ پیر کی رات جکارتا کے قریب بیکاسی کے علاقے میں اس وقت پیش آیا جب ایک مسافر ٹرین اور طویل فاصلے کی ٹرین آپس میں ٹکرا گئیں۔
ریاستی ریلوے کمپنی پی ٹی کے اے آئی کے چیف ایگزیکٹو بوبی راسیڈین کے مطابق ہلاکتوں کی تعداد بڑھ کر 14 ہو گئی ہے۔
انڈونیشیا کی سرچ اینڈ ریسکیو ایجنسی کے سربراہ محمد سیافی نے بتایا کہ امدادی کارروائی انتہائی احتیاط سے انجام دی گئی، کیونکہ مسافر شدید طور پر تباہ شدہ بوگیوں میں پھنسے ہوئے تھے۔
انہوں نے کہا کہ “ہمیں مخصوص مہارت رکھنے والے اہلکاروں کی ضرورت تھی تاکہ محفوظ طریقے سے متاثرین کو نکالا جا سکے۔” ان کے مطابق اب مزید کسی مسافر کی تلاش نہیں ہے، تاہم ملبے کی مکمل تلاشی کا عمل جاری رہے گا۔
حکام کے مطابق حادثے میں سب سے زیادہ نقصان خواتین کے لیے مختص بوگی کو پہنچا، اور تمام ہلاک شدگان خواتین تھیں جن میں زیادہ تر کو دبے ہوئے لوہے نے اپنی لپیٹ میں لے لیا۔
ریسکیو اہلکاروں کو حادثے کے بعد بوگیوں کو کاٹ کر اندر پھنسے افراد تک پہنچنا پڑا۔
ابتدائی تحقیقات کے مطابق ایک ٹرین پہلے ٹریک پر موجود ٹیکسی سے ٹکرائی اور بعد میں دوسری ٹرین سے جا ٹکرائی۔
حادثے کے بعد صدر پرابوو سبیانتو نے واقعے کی تحقیقات کا حکم دیتے ہوئے ٹرین لائن کے قریب فلائی اوور بنانے کا اعلان کیا ہے، جبکہ ریلوے نظام کی دیکھ بھال سے متعلق خدشات بھی ظاہر کیے گئے ہیں۔
انڈونیشیا کی نیشنل ٹرانسپورٹیشن سیفٹی کمیٹی اس حادثے کی تحقیقات کر رہی ہے۔
