واشنگٹن: امریکی صدر ڈونلڈ ٹرمپ کی تصویر جلد کچھ امریکی پاسپورٹس میں شامل کی جائے گی، جسے ماہرین ایک غیر معمولی اور روایتی اصولوں سے ہٹ کر اقدام قرار دے رہے ہیں۔
امریکی محکمہ خارجہ کے مطابق یہ خصوصی پاسپورٹ امریکہ کی آزادی کے 250 سال مکمل ہونے کی مناسبت سے جاری کیا جائے گا۔ اس اقدام کے تحت محدود تعداد میں پاسپورٹس تیار کیے جائیں گے جن میں تاریخی علامات کے ساتھ صدر ٹرمپ کی تصویر بھی شامل ہوگی۔
محکمے نے سوشل میڈیا پر ایک نمونہ پاسپورٹ بھی جاری کیا ہے جس میں 1776 کے اعلامیہ آزادی کے پس منظر میں ٹرمپ کی تصویر اور ان کے دستخط سنہری رنگ میں درج ہیں۔ ایک اور ڈیزائن میں امریکی بانیانِ ملک کی تاریخی تصویر شامل ہے۔
حکام کے مطابق یہ خصوصی پاسپورٹس صرف واشنگٹن میں ذاتی اپوائنٹمنٹ کے ذریعے دستیاب ہوں گے اور یہ سہولت محدود مدت کے لیے ہوگی، تاہم عام پاسپورٹ سروسز پر اس کا اطلاق نہیں ہوگا۔
ڈیموکریٹ رہنماؤں نے اس فیصلے پر تنقید کرتے ہوئے کہا ہے کہ یہ ٹیکس دہندگان کے پیسے کا غیر ضروری استعمال اور ذاتی تشہیر کے مترادف ہے۔
اس سے قبل بھی ٹرمپ انتظامیہ پر سرکاری اداروں اور کرنسی پر صدر کا نام اور تصویر نمایاں کرنے کے الزامات لگتے رہے ہیں، جسے ناقدین حکومتی روایات سے انحراف قرار دیتے ہیں۔
